الثلاثاء، 9 يونيو، 2009

على حرف السور

على حرف السور
واقف
فوق عمارة باربعين دور
راسك عالية
وعنيك سرحانة
وقلبك مكسور
*********
فارد دراعاتك
حاضن دنياتك
مستغني عن الكل بذاتك
بتغني ، ولا حدش سامعك
أغنية من نبض حياتك
وبتسقي بعيونك شجرة حبك
وما حدش حاسس دمعاتك
***********
على حرف السور
اللي انت بنيته ....بعمرك
واقف ، بتهزك ...
نسمة وكأنك
عود أخضر ..في الغيط ...إكمنك
ساكن في براح
وفقلبك
فرد حمام صداح
ولو انك
في العشق ده مش مرتاح
ولا عمرك
نلت اللي اتمنيت
************
على حرف السور اللي انت زمانه
قلبك بيسافر وانت مكانك
ولما تسافر
قلبك يفضل حانن لمكانه
************
على حرف السور
فعيونك دمعه
على حرف السور
وفقلبك شمعة
على حرف السور
حلمك جاري
على حرف السور
عالمتداري
على حرف السور
واقف فوق عمرك
مستني ...ولا حد انتظرك
مع إنك
راسك عالية
وعنيك دفيانه
وقلبك مليان بالنور

مايو- يونيو 2009
حاسب نفسك

حاسب نفسك
اهزم يأسك
سايس يومك
غازل غدك
عاتب أمسك
داوي بعطفك كل جراحك
وانشر فوق الدنيا جناحك
ده العمر براح
واليوم روّاح
ومعاه الروح بتروح
ويقل براحك
**********
حاسب نفسك
واهزم يأسك
إوصل خلك
واسعد حِبك
سامح ناسك
وابدر فوق الأرض آمالك
تطرح حلم وعلم عيالك
ده الكون سواح
واليوم لو راح
معاه بتروح أحزانك ويّا افراحك
**********
حاسب نفسك
اهزم يأسك
واوعى تقوللي إنك زهقان
أو تعبان
أومالقتش فعمرك إنسان
يستاهل لقب الإنسان
ده فكله ...جراح
يا زمن دباح
اقتلني لكن من فضلك ...بحنان
***********
حاسب نفسك
اهزم يأسك
ومهما تضيق الدنيا عليك
ربك حايفرّج من حواليك

17مايو 2009

الاثنين، 21 يوليو، 2008

22 يونيو، 2008

دنيا
آخر النهار..
روحت بيتي استريح..
لقيت في البيت هم و مرار..
زود شجون قلبي الجريح..
* * *
رحت لصديقي..
اشكي له بختي القليل..
لكن لقيت همي
لما ركنت على صاحبي تقيل
* * *
رحت لحبيبي ابكي له من الايام..
لكن حبيبي لم يرد عليا..
وسابني وحدي
اقاسي الوحدة والآلام..
* * *
رحت لعدوي..
يمكن ارتاح لما يشمت فيا..
لكنه كشر و اتنفض ..
و قالي روح.. احسن تصعب عليا..!!!!
* * *
يا ربي زهقت من نفسي ومن حظي وحياتي..
وكرهت ايامي اللي راحت
ومش عارف اعيش الآن..
ولاعايز زمني اللي آتي..

الأحد، 22 يونيو، 2008

صبح الصباح

صبح الصباح يا بُرَم
وليلة عدت من عمرك العطشان
سهران تناجي الهم
والهم بيك اتبَرَم
والقلب م الاشواق كما البركان...
عايش يا مسكين كأنك
وسط العواصف هَرَم
وانت من جواك
اغلب من الغلبان..
* * *
صبح الصباح يا جدع
وعليك اتحسب يوم..
قوم بقى ياللا و اتمطع
وقول : بناقص يوم
* * *
صبح الصباح عليا...وانا وحدي
والهم لو ينزاح
مين يحمله بعدي؟
* * *
صبح الصباح وكان في عيوني زي عتمة ليل
ايه يفرق الصبح ده
عن اي صبح ابيل
وده ليل بيولد فجر
ونهار بيولد ليل
والعمر بيعدي وانا...كما كنت
همي عليا تقيل
* * *
صبح الصباح..وهمس لي ..استنى
يمكن ساعات النهار تجيب ماتتمنى

أنا مين

بتسأليني انا مين؟..
انا
جد..
وعيشتي بسيطة كده ع القد..
وعمري ما باحكي همومي لحد..
ده ماحدش ناقص يسمع حد..
بجد..
انا عمري ما خنت..
وصافي النية..واحب الناس
انا دايما كنت..
ويا ريتني ما هنت..
****
يا ورد..
يا ورد خدودك... عايز... اشم...
وانسى ف عينك حزن.... وهم..
بحبك..
بحبك قد الدنيا..واغير
و بحب اطير زي العصافير
و بحبك..حر..
حر..وصابر عالمكتوب..
وبقول ايوب..لو كان عن صبره يتوب..
كنت اتوب..عن حبك
ياللي في عينك
كان الرد..
****
.برىء..
كما كنت بريء في طفولتي..وحاكونها في شيبتي..
وحاصون الوعد..
لاني بجد
عمري ماخنت...ولا اترددت فحبي..
واسألي قلبي..يقولك اني..
جد.. وعيشتي بسيطة قوي ..ع القد..

بحبك

سكوتي في حضورك
يقولك ...بحبك
ونظرة عينيا بتصرخ..
بحبك..
وكل الكلام اللي قلته و حاقوله..
له معنى واحد..
اني.. بحبك..
* * *
بحبك بحبك ..يا امي و بنتي ..
كأني منك..
وانت مني اتخلقتي
* * *
سكوتي وكلامي
بيفضح غرامي..
وحتى فمنامي ..
بنادي.... بحبك..
وحتى فصلاتي..
بادعي..واحبك..
* * *
بحبك بحبك ..يا امي و بنتي ..
كأني منك..
وانت مني اتخلقتي
* * *
ولما باردد بأنفاسي لحن الحياة..
اغني..بحبك..
ولما يتوه مني معنى عمري و ضياه
ادور... واحبك
ولو شفت يوم قلب ضايع بيبكي..
ابكي معاه..
ابكي ....واحبك..
* * *
بحبك بحبك ..يا امي و بنتي ..
كأني منك..
وانت مني اتخلقتي
* * *
يا امي وبنتي..
يا حقي .. وحقيقتي...
سكوتي وكلامي..
وفكري وهيامي..
بيعلن حقيقة واضحة خالص صريحة..
انك.. حبيبتي..

الى نفسي

الى نفسي..
اليوم فقط علمت اني كنت اخدعك,واقول انه يوجد غيرك, واحبه..غير اني فهمت وتعلمت :انه لا يوجد لي الا سواك..
**********
النهاردة مش حاغني غير لنفسي..
هي بكرة .. هي يومي ..
هي امسي..
*******
وحاكتب لك .. وحاحكي لك .. واغني لك..
*******
النهاردة حاتولد لك..
وانتشي ..
م الحب .. ومن جمالك..
واقول يا روحي نعنشي..
بعد كل اللي جرالك..
****
نفسي اتكلم و ابوح..
واطير حمامي..
فوق غصون الدوح..
***
ايه جرالك؟
ايه اللي نابك؟
مبسوط شويه؟..
يا ريت..
ده الهم طابق
والحزن سابق..
وعيوني جعانة حنان
م الغربة في وسط الاهل
و حنين الروح
لحبيب الروح اللي مشي..
*********
لا يا قلبي متخونش اللي خانك..
********
ياعبير الورد في يوم الربيع
ليه جمالك مش نصيبي..
لو يعود العمر في زمنه البديع
وتكون حبيبي ..لو...
لو.. ولو ....ولو...
واه م الحظ لما يخلف..
يا عبير الورد..
*********
النهاردة..
مش ح اغني لاي حوا
كلهن صنف واحد .. ناقصات للمروة..
***********
النهاردة مش ح اغني لاي بنت
كلهن راهبات
عند رب الشر ست
**************
النهاردة مش ح اغني لاي نسوة..
كلهن ناعمات مظهرا
والاصل قسوة..
**************
النهاردة مش حاغني لاي حرمة..
اعلاهن في زمانك
لا تساوي نعل صرمة..

زمان

يا مين يجيبلي زمان..
يشبه زمان..
او حتى ساعة منه...
ده أنا عندي م الأحزان..
لو فرقوه اطنان..
يفيض كتير منه..
***
انت وانا تايهين ...
انت فمكان .. يمكن بعيد ..
وانا فمكان ماهوش اكيد ..
تايهن ..
بيني وبينك .. سدين..انت وانا
******
انت و أنا....تايهين ..
غربا .. و مستنيين ..
لحظة ...او سنين..
ايه يفرق الزمان
مع اللي مش فاكرين؟
****
تايهين..
بنحب بعض قبل اللقا..
كلمة حنين متفرقة..
لكن قلوبنا متشوقة ..
لهفة وعطش..
للحظة صدق..
تنده لي .. يا انسان..
يمكن يرجع زمان..
وارجع واقول كمان..يا مين..يجبلي زمان

طيف حبيبي

الحب طعمه حلو ..
وساعات بيبقى مر..
لما يرق الحبيب ..
تلاقي حالك يسر
ولما يبعد حبيبك يا قلبي..
تبعد الأيام عن حياتك..
و تبقى دقاتك..
دقة هجر..
ودقة صبر..
***************
وتحلم يا قلبي واحلم معاك..
انا هنا يا طيف حبيبي..مستني..
المسني..
وفي ليلي الطويل..ونسني..
عندي كلام ينقال في الف ليلة..
حقوله في نظرة واحدة من عنيا..
عندي غرامي ومشاعري الجميلة..
عندي من الشوق والحب والحنية..
عندي.... بحبك..
شايلهالك في قلبي..
تعالى يا طيف حبيبي اقولك..
اللي مش حاقدر اقوله لحبيبي..



شكوى

شكواي في الليل الاثيم:هباء..
كأنها اناث برغوث,في جوف قوقعة,في عمق المحيط..
هباء كأني لم اوجد ابدا..
فعليك مرارتي و احزاني..
وعليك اشجاني..
********
لو كان هناك احياء في كوكب زحل..
لقالوا ان الارض كوكب نحس..
*********
شكواي مني الي.....
كصدى صوت بكاء..
بلا شريك .. ولا رفيق..
بلا سلوى.. ولا عزاء...
لكن قلبي مازال يهفو..
لعطر اللقاء..
قلبي الغر البريء..
مريض:محب يكره!
مرض .. ليس له دوء..
*********
أداعب اوتار النفس الحبلي بالاحزان..
لانسي اني وحدي في الدنيا..لانسى الحزن واشفى من نزق الحرمان..



نون

نون...
واماني القلب المجنون..
احببتك حبا ليس بممنون..
ورآني الناس وعرفوا.. اني مفتون..
فتعالي ...
.ودعينا من كل الدنيا..
وأحبيني..
أحبيني..أحبيني..أحبيني..
ودعيني..
المس كفيك..
وتقبل عيني عينيك..
وأناجيك بلغة لا يفهمها
الا اهل النون..



الاثنين، 9 يونيو، 2008

يا رب

يا ربي..
مال الحياة صبحت عليا عبء تقيل
بمشي و روحي محنية
كأني عجوز
ملّ النهار و الليل
والدنيا تحدف عليا:
مرة خسيس ....
و مرة خاين .....
و مرة شخص رزيل ...
احترت في حكمتك يا رب ..
ازاي تمزج الحسّاس
مع المحروم من كل حسّ جميل؟؟؟
*******************
يا رب...
مال الضباب ملو الطريق
ومركبي تايه غريق
مال الامور متأزمة
والسكة سودة و مضلمة..
والايمان غلّت اياديه سلاسل كفر..
والنتيجة فقلبي.. صفر صفر..
مالي انا
اصبحت وكأني مش أنا
وكأن ايامي اللي فاتت كلها كانت..
حلم شافه واحد غيري انا
********************
يا رب..لو بتحبني زي ما بحبك..
الحقني قبل ما اصبح حكاية
وكلمة تتقال باستهانة