الثلاثاء، 9 يونيو، 2009

على حرف السور

على حرف السور
واقف
فوق عمارة باربعين دور
راسك عالية
وعنيك سرحانة
وقلبك مكسور
*********
فارد دراعاتك
حاضن دنياتك
مستغني عن الكل بذاتك
بتغني ، ولا حدش سامعك
أغنية من نبض حياتك
وبتسقي بعيونك شجرة حبك
وما حدش حاسس دمعاتك
***********
على حرف السور
اللي انت بنيته ....بعمرك
واقف ، بتهزك ...
نسمة وكأنك
عود أخضر ..في الغيط ...إكمنك
ساكن في براح
وفقلبك
فرد حمام صداح
ولو انك
في العشق ده مش مرتاح
ولا عمرك
نلت اللي اتمنيت
************
على حرف السور اللي انت زمانه
قلبك بيسافر وانت مكانك
ولما تسافر
قلبك يفضل حانن لمكانه
************
على حرف السور
فعيونك دمعه
على حرف السور
وفقلبك شمعة
على حرف السور
حلمك جاري
على حرف السور
عالمتداري
على حرف السور
واقف فوق عمرك
مستني ...ولا حد انتظرك
مع إنك
راسك عالية
وعنيك دفيانه
وقلبك مليان بالنور

مايو- يونيو 2009

ليست هناك تعليقات: